Prorectorat
Administraziun
Cun surpigliar internamain l’administraziun dal persunal e da finanzas, cun modernisar l’infrastructura digitala e cun stgaffir sin il campus in paradis per avieuls selvadis han pudì vegnir realisads projects decisivs.
Durant l’onn da rapport han ins pudì cuntanscher trais terms impurtants che han la finamira da porscher a las studentas ed als students sco er a las collavuraturas ed als collavuraturs cundiziuns da basa optimalas per ina furmaziun e furmaziun supplementara orientada a la professiun. En il center da las stentas èn stadas las activitads dad insourcing en ils secturs dal persunal e da las finanzas, l’introducziun da novs sistems per la contabilitad da finanzas e da la paja sco er il remplazzament dal sistem administrativ da las scolas autas. Ultra da quai è la SAP dal Grischun s’engaschada en il rom da sia responsabladad per las scolas autas per la protecziun da l’ambient e da las spezias ed ha creà sin il campus in paradis per ils avieuls selvadis. Questas mesiras han gidà d’optimar ils process, d’orientar las activitads anc pli fitg als basegns da las commembras e dals commembers d’ina scola auta ed han contribuì a moda positiva e persistenta a l’equiliber ecologic.
Administraziun independenta dal sectur dal persunal
La decisiun da manar a moda independenta il sectur dal persunal è stada in pass impurtant per rinforzar las cumpetenzas internas. Cun prender enavos questa funcziun ha pudì vegnir cuntanschì ina pli stretga colliaziun tranter ils differents secturs da prestaziun ed il sectur dal persunal. D’impurtanza centrala è stada la creaziun da las cundiziuns da basa necessarias per pudair s’occupar specificamain dals basegns da las collavuraturas e dals collavuraturs. Quai cumpiglia tant l’optimaziun dals process interns sco er l’introducziun da products da software adattads. La liquidaziun interna da process dal persunal duai ultra da quai contribuir ad ina cuntentientscha pli gronda da las collavuraturas e dals collavuraturs cun pudair s’occupar a moda persunala ed effectiva da lur giavischs e da lur dumondas.
Administraziun independenta dal sectur da finanzas
Analog a l’administraziun dal persunal èn era vegnidas integradas cun success las finanzas e la contabilitad. Quest pass è stà necessari per pudair dumagnar meglier la cumplexitad da noss process finanzials e per cuntanscher ina pli gronda flexibilitad en l’administraziun da las resursas finanzialas. L’insourcing ha pussibilità da drizzar ils process da finanzas sin ils basegns da l’instituziun e da preparar en quest connex pli spert la basa per decisiuns impurtantas. A medem temp èsi reussì da digitalisar process e da servir als manaders da project infurmaziuns actualas davart lur projects. La meglra controlla e transparenza dals process finanzials gidan considerablamain che la SAP dal Grischun po ademplir sias obligaziuns areguard la gestiun da las finanzas da la scola auta.
Remplazzament dal sistem administrativ da las scolas autas
Il remplazzament dal sistem vertent da l’administraziun da la scola auta tras ins soluziun ch’è pli adattada per la SAP dal Grischun, è stada in’ulteriura investiziun impurtanta en l’infrastructura digitala. Quest project è vegnì inizià avant passa sis onns e differents pass dal process èn vegnids exequids, sco per exempel vastas analisas dal basegn, ina publicaziun sco era fasas da planisaziun detagliadas. La fasa finala da l’introducziun e da la migraziun, che ha durà otg mais, è vegnida terminada cun success punctualmain sin il cumenzament da l’onn da studi 2024/2025.
Stgaffir in paradis per avieuls selvadis sin il campus
En il rom da la responsabladad sco scola auta ha la direcziun da la scola auta definì – sin basa da las 17 finamiras per in svilup persistent da las Naziuns unidas – quatter accents per la perioda da strategia che va a fin. Sco segn visibel da quest engaschament è vegnì stgaffì sin il campus in paradis per avieuls selvadis. Quel consista da differentas zonas ch’èn vegnidas concepidas en accord cun la natira integrond massa fluras e plantas e numerusas pussaivladads per far gnieus. El n’è betg sulettamain ina contribuziun ecologicamain preziusa per proteger las spezias, mabain serva sco object d’instrucziun e d’emprender vivent per las studentas ed ils students e vegn era mess a disposiziun a scolas l’onn proxim.
Ulteriurs temas che pudessan interessar Vus
