Prefaziun

In emprim onn n’è mai mo in emprim onn. Igl è in passadi, ina midada da perspectiva – ed in invit da dar in’egliada sin quai ch’è sa cumprovà. Dapi il 1. da november 2024 è Reto Givel-Bernhard rectur da la SAP dal Grischun ed a partir dal 1. da favrer 2025 è Letizia Ineichen la nova manadra dal prorectorat furmaziun. La direcziun da la scola auta, che sa constituescha uschia da nov, vul sviluppar vinavant la scola auta trilingua.

La SAP dal Grischun ha cumenzà l’onn nov or d’ina ferma posiziun. Otg studis etablids, collavuraturas e collavuraturs engaschads e cun 523 studentas e students l’atun 2025 uschè bleras studentas e students sco anc mai – è quai senza avair quintà las studentas ed ils students dals studis da cooperaziun Pedagogia curativa da scola e Stgalim secundar I per persunas d’instrucziun da la scola primara. Quest fundament è il resultat d’ina lavur da basa prospectiva da la direcziun da la scola auta. Sin quai sa basain nus – betg per disa, mabain ord persvasiun.

Era persunalmain è quest onn caracterisà da famigliaritad e mirveglias. President e rectur portan blers onns experientscha da manar en differents spazis da furmaziun. Il nov rectur enconuscha dapi onns la Scola auta da pedagogia dal Grischun: Dapi l’avust 2019 ha el fatg part da la scola auta sco prorectur furmaziun, el enconuscha las fermezzas da la scola, gist uschia sco ses champs da svilup. Il sguard frestg da dadora s’unescha cun la chapientscha creschida da l’intern.

Ina scola auta dovra clerezza en la direcziun. Il cussegl da la scola auta ademplescha sia responsabladad strategica, la direcziun da la scola auta maina sin plaun operativ. Questas rollas èn vegnidas rinforzadas sapientivamain il matg 2025: Cun reglar da nov las cumpetenzas d’engaschament e da desditga è la responsabladad persunala là nua ch’ella appartegna – datiers da la realitad operativa. Quai rinforza la direcziun, accelerescha process e creescha transparenza.

Questa clerezza sa mussa er en la collavuraziun tranter il president ed il rectur. Ella è stretga, intensiva e marcada da confidenza vicendaivla – cun discurs regulars, cun bunas preparaziuns e reflexiuns e cun ina chapientscha da responsabladad cuminaivla, er en cas da decisiuns fitg pretensiusas en connex cullas finanzas e la politica.

In segn visibel per l’avegnir è il project da construcziun che cumpiglia la sanaziun e l’engrondiment da l’infrastructura da la scola. Ensemen cun l’architect chantunal, Andreas Kohne, e ses team, è vegnida elavurada l’onn 2025 la basa centrala; il studi davart la realisabladad vegn terminà il 2026, la publicaziun vegn lantschada. Pablo Horváth, architect dals auditoris e da la biblioteca, ha sensibilisà tant il cussegl da la scola auta sco era la direcziun da la scola auta en il rom da visitas guidadas per l’inventari degn da vegnir protegì.

L’avegnir na sa mussa dentant betg mo en il lieu, mabain surtut en l’emprender. La retraite a la Alemannenschule Wutöschingen ha irrità il cussegl e la direcziun da la scola auta – quai dentant da maniera positiva. Ina scola che viva novas furmas d’emprender entaifer las cundiziuns generalas dal stadi e che ha success. La scola auta n’è betg ina scola populara. La Germania n’è betg la Svizra. E tuttina èsi cler: cun emprender29 ha la SAP dal Grischun l’incumbensa da patratgar da nov l’instruir e l’emprender e da preparar da maniera consequenta las studentas ed ils students per ina scola en transfurmaziun.

L’onn proxim spetgan cun la dumonda per ina professura speziala, cun sviluppar vinavant il project da construcziun e cun emprender29 ulteriuras incumbensas directivas ed il cussegl da la scola auta vegn nominà per part da nov per la perioda d’uffizi 2026 fin 2030.

Per ch’ina scola auta funcziunia e sa sviluppeschia, dovri ina cooperaziun reussida da numerus gremis e da numerusas persunas. Noss engraziament sa drizza perquai a las collavuraturas ed als collavuraturs, a las persunas d’instrucziun da la pratica, a la direcziun da la scola auta, al cussegl da la scola auta, a la regenza e sia administraziun, al parlament ed a tut quels che contribueschan da sviluppar vinavant la scola auta. Mo ina collavuraziun cun cleras finamiras da tut ils players, ensemen cun las studentas ed ils students e cun las participantas ed ils participants da la furmaziun supplementara, pussibilitescha da far diever da maniera optimala da la SAP dal Grischun per la scola populara dal futur.

La SAP dal Grischun stat avant in mument decisiv cun preparar decisiuns directivas per la furmaziun futura da las persunas d’instrucziun e cun concepir communablamain la scola auta dal futur, quai cun integrar tut las persunas participadas.