Al motto da giubileum «Ina furmaziun d’auta qualitad per tuts» èn era s’orientadas las purschidas dal prorectorat furmaziun supplementara e servetsch. Il «per tuts» ha il prorectorat ademplì cun sclerir ils basegns da las scolas. Da quai è resultà er il 2023 in program multifar. Multifar en vista a temas, ma er a settings. Uschia han persunas d’instrucziun, mainascolas e docentas e docents era l’onn 2023 pudì concepir individualmain lur furmaziuns supplementaras.
Ina persuna d’instrucziun per exempel ha tschernì dal program da curs, che cumpiglia var 100 curs, la furmaziun supplementara «Crear textilias cun serigrafia», ha deditgà in di a l’emprender dad ina abilitad specifica ed ha applitgà quella gist durant la proxima emna da project en sia scola. In’autra persuna d’instrucziun è sa decidida per il CAS Svilup da l’instrucziun cun il model da Cuira, ina da las sis scolaziuns cun certificat che han cumenzà il 2023. En il decurs da l’onn vegn ella a sviluppar vinavant l’atgna instrucziun e prender cumià per quai da la stanza da scola endrizzada da maniera convenziunala.

Ma il motto da giubileum na cuntegna betg be la «furmaziun per tuts», mabain era la «furmaziun d’auta qualitad». En quest connex ha il prorectorat focussà differents temas e servetschs. Il focus sin la persistenza da las purschidas è vegnì approfundà vinavant il 2023. Ina midada persistenta dovra temp. Quai mussa l’exempel da la scolaziun da certificat d’in onn ch’accumpogna e sustegna las midadas en l’atgna instrucziun. Plinavant han differentas collavuraturas e differents collavuraturs dal prorectorat puspè dastgà accumpagnar e cussegliar scolas durant lur process da svilup strategic concernent l’instrucziun u la structura.

Ils temas da la strategia èn vegnids approfundads da maniera specifica. Qua duai vegnir accentuada la finamira strategica «Furmaziun en la midada digitala». Las activitads da MINT cumprovadas ed etablidas èn vegnidas promovidas vinavant e l’emprim curs dal CAS Furmaziun en la midada digitala ha pudì vegnir lantschà.
Dapi la lantschada da ChatGPT ha il tema intelligenza artifiziala survegnì fitg spert dapli impurtanza. La furmaziun è pertutgada en tut ils ciclus da quest tema. La SAP dal Grischun è s’occupada baud e cun spiert avert, dentant cun il senn da responsabladad necessari era per aspects delicats, cun questa nova tecnologia. Bainprest ha il post spezialisà eLearning lantschà curs per docentas e docents interns e sviluppà purschidas per las scolas. Gia l’atun èn vegnids purschids ils emprims curs e la tematica è vegnida integrada en differents programs existentas. Igl è indispensabel che p.ex. las participantas ed ils participants dal CAS Direcziun da la scola u dal master Svilup da la scola s’occupian dal tema. Ils curs èn stads occupads svelt ed ins ha stuì lantschar ulteriuras purschidas. Dapi l’atun datti adina dapli dumondas per furmaziuns supplementaras entaifer la scola, docentas e docents èn vegnids envidads per referats davart quest tema (p.ex. Federaziun da mainascolas dal Grischun) u han pudì manar workshops (p.ex. a la fiera da furmaziun Swissdidac). Adina pli savens datti era dumondas d’ordaifer il Grischun. Uschia èsi reussì a nus da fitgar pe en quest champ tematic che sa sviluppa a moda rasanta. Il tema sa mida vinavant e vegn er ad accumpagnar nus l’onn proxim. Noss engaschi e plaschair per il svilup resta constant.