Prorectorat
Furmaziun
«Malgrà tut il bainstar datti era per ils affars in cunfin misterius dal svilup, sco per tut quai ch’è organic.»
– Robert Musil
Creschientscha en il dretg mument
L’onn 2023 è stà sut l’ensaina dal creschament. Cun 197 studentas e students han cumenzà l’atun tantas studentas e students sco anc mai lur scolaziun a la SAP dal Grischun. Uschia cuntinuescha l’augment da novas studentas e novs students. Cun totalmain 516 studentas e students ha la SAP dal Grischun surpassà per l’emprima giada il cunfin da 500. Uschia è il dumber da studentas e students creschì entaifer paucs onns per bun 50%. Betg resguardads en questas cifras èn las 14 studentas e students dal studi Sec I per persunas d’instrucziun da la scola primara a la SAP da S. Gagl sco era las 24 persunas ch’èn inscrittas per il studi pedagogia curativa da scola (SHP) a la Scola auta da pedagogia curativa (HfH) a Turitg. Omadus studis vegnan realisads cumplettamain u per gronda part a Cuira.
Novs studis decleran ina part da l'augment
Circa la mesadad da la creschientscha è d’attribuir als novs studis ch’èn vegnids introducids l’onn 2022:
- Il nov studi scolina e scola primara (1. e 2. classa) remplazza il studi da bachelor scolina ed è pli attractiv pervi da la qualificaziun d’instruir pli cumplessiva. Spezialmain tar las studentas ed ils students da lingua taliana è l’augment considerabel cumpareglià cun il studi da scolina. Il fanadur ha la conferenza da las directuras e dals directurs chantunals da l’educaziun publica (CDEP) renconuschì quest nov studi en l’entira Svizra.
- Il studi da master Sec I per persunas cun in bachelor spezialisà ed il studi cumbinà Sec I e scolas da maturitad per persunas cun in master spezialisà amplifitgescha la purschida da la SAP dal Grischun. Pervi da lur forza innovativa han ils dus studis era gì in grond resun tar autras scolas autas. Las studentas ed ils studentas elavuran da maniera autonoma las cumpetenzas relevantas per il mintgadi d’instrucziun e las docentas ed ils docents als accumpognan individualmain u en gruppas. La regenza ha dumandà la CDEP da renconuscher quests dus studis.
L’autra mesadad dal creschament na sa lascha betg declerar cleramain. Nossas enquistas mussan dentant che las persunas d’instrucziun futuras vulan avair ina professiun che fa senn e ch’ellas vulan surpigliar responsabladad. Ultra da quai ha la SAP dal Grischun augmentà ils ultims onns sia visibilitad cun la nova homepage, cun sia preschientscha en las medias socialas e cun ina nova campagna da placats.
Era il svilup dals studis existents dastgass avair contribuì sia part al creschament. La structura dal studi è daventada pli chapaivla: Da nov declera in concept da studi las linguas estras, la pratica professiunala ed auters terms centrals dal studi. Da nov sa restrenschan las cundiziuns da basa legalas sin dus documents. Da nov enconuschan las studentas ed ils students gia al cumenzament dal studi ils plans annuals futurs. Talas meglieraziuns pussibiliteschan a las studentas ed als students da sa concentrar pli fitg sin l’acquist da las cumpetenzas empè sin l’organisaziun dal studi.
Igl è cler che l’augment è natiralmain bainvegnì pervi da la situaziun precara dal persunal en la scola populara.
132 diploms d'instrucziun novs
L’onn 2023 han totalmain 114 absolventas ed absolvents survegnì in diplom d’instrucziun per la scolina u la scola primara:
- 87 diploms da lingua tudestga
- 6 diploms da lingua taliana
- 4 diploms da lingua tudestga e taliana
- 17 diploms da lingua tudestga e rumantscha
Plinavant han 18 persunas d’instrucziun da la scola primara, ch’èn stadas inscrittas a la SAP da Son Gagl, survegnì in diplom d’instrucziun per il stgalim secundar I.
620 plazzas da praticum
Il creschament chaschuna sfidas en spezial per la pratica professiunala. Cun 620 plazzas da praticum è il basegn stà uschè aut sco anc mai durant l’onn da rapport.
Pratica professiunala innovativa
La pratica professiunala ha ultra da quai introducì novaziuns impurtantas. Da nov absolvan tut las studentas e tut ils students da bachelor durant l’emprim onn da studi ina part pratica tant en la scola primara sco er en scolina. Uschia survegnan els in’invista en las differentas culturas ed en ils differents stgalims da svilup. Sin fundament da questas experientschas pon els midar il studi tschernì al cumenzament dal studi.
Da nov è l’examinaziun da la qualificaziun professiunala pli pretensiusa. Las studentas ed ils students ston ademplir senza excepziun ils criteris cumpetenza sociala e relaziunala, autocumpetenza e cumpetenza d’organisaziun. L’examinaziun da la qualificaziun professiunala è gia terminada suenter in onn.
Da nov èn persunas d’instrucziun cun experientscha involvidas en la preparaziun e l’evaluaziun dals praticums, quai sco uschenumnadas docentas e docents da la pratica. La perspectiva teoretica e pratica sa cumpletteschan qua tras vicendaivlamain. Las experientschas ed ils resuns da l’emprima runda èn positivs.
Da nov collavura la SAP dal Grischun en connex cun ils praticums dapli cun scolas svizras en l’exteriur. Enstagl en il chantun Grischun ed en chantuns vischins pon las studentas ed ils students absolver in praticum en l’Italia, en Spagna u en l’America dal sid.
Creschientscha munta adattaziuns
Il creschament è collià cun sfidas finanzialas, persunalas ed infrastructuralas sur las plazzas da praticum or. La SAP dal Grischun ha perquai decidì mesiras da spargn, dumandà in credit supplementar, engaschà tschintg novas docentas e docents en uffizi principal e prendì a fit novas localitads a la plazza da la posta che pussibiliteschan a medem temp era furmas innovativas d’emprender.
La nova structura augmenta la qualitad
Il prorectorat furmaziun ha consolidà durant l’onn dal rapport la nova organisaziun da la structura introducida l’onn 2022.
Las quatter manadras e manaders dal champ suttamess al prorectur furmaziun mainan las docentas ed ils docents, planiseschan ils pensums e sviluppan vinavant qualitativamain lur champs. Questa structura nova sa cumprova en spezial, perquai che las manadras ed ils manaders dals champs instrueschan parallelamain ed enconuschan uschia bain ils basegns e las sfidas da las docentas e dals docents tras lur vischinanza professiunala e persunala. Durant l’onn dal rapport han els pudì meglierar oravant tut la planisaziun dals pensums e la coordinaziun tranter ils singuls prorectorats.
Dapi la realisaziun da la nova organisaziun da la structura è plinavant il stab prorectorat responsabel per la planisaziun dals studis da bachelor e da master sco era per la coordinaziun da quels cun l’informatica. Dapi l’onn dal rapport han las studentas ed ils students access a tut las datas persunalas sur mia, la plattafurma interna da la scola auta. Las studentas ed ils students pon per exempel chargiar giu sur la plattafurma confermas d’immatriculaziun ed extracts da notas, reservar stanzas, pajar taxas e prender invista da lur urari persunal.
Qualitad e chapientscha d’instruir e d’emprender
Furmas innovativas d’instruir e d’emprender stattan pia er en il focus dals proxims onns. Per colliar optimalmain la teoria e la pratica, per promover l’activaziun da las studentas e dals students e per satisfar a lur eterogenitad, vul la SAP dal Grischun sviluppar vinavant sistematicamain la chapientscha fundamentala d’instruir e d’emprender dal studi da bachelor.
Per mai è la SAP dal Grischun il lieu, nua ch’il fundament per la furmaziun da noss futur vegn mess e nua ch’il panorama da furmaziun dal Grischun vegn furmà a moda variada, creativa e progressiva.
– Laura Lutz, anteriura presidenta da la Magistraglia grischuna (LEGR)
Ulteriurs temas che pudessan interessar Vus
