L’onn passà ha l’administraziun da la Scola auta da pedagogia dal Grischun liquidà las incumbensas quotidianas ed ha a medem temp lavurà vinavant vi da la SAP dal Grischun dal futur. Tranter auter è vegnì terminà il concept d’utilisaziun e da gestiun ch’è vegnì elavurà en collavuraziun cun l’uffizi da construcziun auta dal Grischun, igl è vegnì evaluà ina nova software d’administraziun per la scola auta ed ins ha uschia pudì surdar il project. Medemamain èn avanzadas las lavurs per tgirar da maniera autonoma ils champs persunal e finanzas. Quests e numerus auters projects fan part da la finamira strategica «Concepir la SAP dal Grischun dal futur», che ha l’intent da porscher a las studentas ed als students sco er a las collavuraturas ed als collavuraturs cundiziuns da basa optimalas per ina scolaziun ed ina furmaziun supplementara reussida ed orientada a la professiun.

Cun il concept d’utilisaziun e da gestiun è vegnida sviluppada la visiun infrastructura 2030 cun integrar tut las gruppas ch’appartegnan a la scola auta. Studentas e students, docentas e docents, collavuraturas e collavuraturs, participantas e participants d’ina furmaziun supplementara sco era persunas d’instrucziun e manadras e manaders da scola han discutà e concretisà ensemen cun expertas e cun experts ils basegns, las ideas, ils maletgs, dentant er ils elements cumprovads e main cumprovads da l’infrastructura actuala. Uschia è resultada ina visiun acceptada e che represchenta ina gronda part areguard las localitads d’instruir, d’emprender e da lavurar da damaun. Tenor questa visiun sto ina scola auta da pedagogia moderna ed attractiva disponer da locals d’instrucziun multiopziunals sco era da lieus da scuntrada cun ina purschida variada d’alimentaziun. L’infrastructura gioga pli e pli ina rolla impurtanta per las scolas autas, d’ina vart areguard l’instrucziun e la perscrutaziun en ils roms ed en ils champs relevants per la furmaziun da scolastas e scolasts. Da l’autra vart influenzescha ina infrastructura moderna en vischinanza da la staziun l’attractivitad d’ina scola auta per studentas e students, per persunas che sa participeschan ad ina furmaziun supplementara sco era per collavuraturas e collavuraturs.

La software d’administraziun per la scola auta è il sistem central per ils prorectorats furmaziun sco er furmaziun cuntinuada e servetsch. En connex cun l’evaluaziun dal nov product èsi vegnì dà gronda paisa che l’applicaziun sa drizzia optimalmain als basegns ed als process da la furmaziun e furmaziun cuntinuada. Persunas interessadas al studi per il proxim cumenzament da studi l’atun 2024 vegnan gia a passar la procedura d’annunzia en la nova applicaziun.

Er en ils secturs persunal e finanzas èn vegnidas evaluadas ed implementadas novas applicaziuns da software. A partir dal schaner 2024 vegn la SAP dal Grischun a pudair realisar tut ils process da quests dus secturs independentamain sin agens sistems. Qua tras po la SAP dal Grischun tgirar sias collavuraturas e ses collavuraturs en contact direct e s’occupar persunalmain dals giavischs da las commembras e dals commembers da la scola auta. Uschia po ella contribuir a la cuntentientscha da las studentas e dals students sco er da las collavuraturas e dals collavuraturs.

Dinesh Rajakaruna, directur administrativ da la SAP dal Grischun, è superbi da las finamiras cuntanschidas ed engrazia a las collavuraturas ed als collavuraturs per lur lavur prestada, per ils impuls prezius ed al cussegl da la scola auta per la confidenza demussada.