Perscrutaziun e svilup

L’onn 2025 ha avert pliras vias al prorectorat perscrutaziun e svilup per pudair sustegnair sin fundament dad enconuschientschas la scolaziun da las persunas d’instrucziun sco era fatgs da scola e d’instrucziun. Surtut ils resultats da la dieta Plurilinguitad e minoritads linguisticas en in context global èn sa mussads sco fitg impurtants, perquai che dumondas linguisticas e socioculturalas en connex cun la diversitad en scola, en l’instrucziun ed en l’emprender èn vegnidas tematisadas e discutadas a moda discursiva ensemen cun scienziadas e scienziads da renum naziunal ed internaziunal. Medemamain èn activitads da perscrutaziun en connex cun meds d’instrucziun e cumpetenzas linguisticas vegnidas francadas en discurs naziunals ed a medem temp hai dà in’avischinaziun a las instituziuns che han in’impurtanza internaziunala en mesirar cumpetenzas linguisticas. En il champ da la didactica da la matematica è sa mussà che l’integraziun dals projects currents da MINT en la professura per didactica da la matematica è stada in pass che ha rendì. Quai ha pussibilità da crear in fundament per elavurar enconuschientschas che sa basan sin perscrutaziun e da metter a disposiziun quellas per concepir l’instrucziun fundada sin la scienza. Las activitads en il champ da las scienzas d’educaziun èn stadas sumegliantas. D’ina vart hai dà contribuziuns profiladas cun caracter da basa en revistas cun renum internaziunal. Da l’autra vart èn vegnids publitgads resultats da perscrutaziun ch’èn sa resultads da projects datiers da la pratica. En spezial èn resultats da perscrutaziun era vegnids mess a disposiziun a la politica da furmaziun, sco per exempel a la direcziun d’educaziun dal chantun Tessin. Sin basa da las enconuschientschas preschentadas, vegn ella ussa a decider davart ina refurma da ses sistem da furmaziun dal stgalim secundar I.

Questas lavurs da perscrutaziun e da svilup numnadas qua mussan exemplaricamain ch’il prorectorat sa participescha cun adina dapli attenziun naziunala ed internaziunala a la furmaziun da persunas d’instrucziun che sa basa sin la scienza. Questa dinamica da svilup productiva è francada en l’expertisa profilada da numerusas scienziadas e numerus scienziads che lavuran a la SAP dal Grischun. Els èn stads il punct da partenza per las activitads scientificas numnadas. En spezial han els gidà che las lavurs da perscrutaziun, fatgas a la SAP dal Grischun, vegnan sustegnidas adina dapli e da maniera substanziala da meds finanzials da terzs. Uschia presta la scola auta contribuziuns impurtantas e renconuschidas per basar sin l’evidenza la furmaziun da persunas d’instrucziun resp. per sviluppar la scola e l’instrucziun en general.