Prorectorat
Administraziun
La gestiun da las finanzas e dal persunal è etablida. En vista a l’avegnir caracteriseschan novas pretensiuns per ambients d’emprender ed il dumber da studentas e students che sa mida il concept d’utilisaziun e da manaschi.
In pass impurtant en l’administraziun da finanzas
L’onn 2025 è stà decisiv: L’emprima revisiun da l’onn da gestiun 2024 dapi la surpigliada da las finanzas e dal persunal cun ina gestiun independenta è vegnida terminada cun success. Il post da revisiun ha dà in fitg bun attestat a la SAP dal Grischun ed ha ludà la gestiun conscienziusa e transparenta da las fatschentas da finanzas e dal persunal.
Quest resultat conferma che la midada a la gestiun independenta dals secturs finanzas e persunal è vegnida realisada cun success e che las structuras ed ils process introducids sa cumprovan. In grond engraziament a tut las persunas che han contribuì a quest success cun engaschament, exactadad e cun senn da responsabladad ed era a las persunas responsablas per lur fidanza demussada.
Svilup dal concept d’utilisaziun e da manaschi
Il concept d’utilisaziun e da manaschi è vegnì repassà en plirs puncts durant l’onn da rapport. Decisivs per quai èn stads d’ina vart ils dumbers da studentas e students ch’èn prognostitgads en il concept per l’onn 2030 e da l’autra vart ils spustaments temporals da la midada planisada. Quests svilups han dà la pussaivladad d’actualisar il concept tant areguard il cuntegn sco er areguard las structuras.
Las prognosas adattadas da l’Uffizi federal da statistica da las scolas autas da pedagogia mussan ch’il basegn da spazi vegn ad esser pli grond che supponì oriundamain. A medem temp sa mussa ina midada qualitativa: Las pretensiuns als conturns d’emprender sa midan, davent da locals classics da seminaris fin a clusters d’emprender flexibels che promovan la collavuraziun e l’emprender autonom.
Cun questas adattaziuns resta il concept d’utilisaziun e da manaschi in instrument progressiv che tegna quint dals basegns creschents da las studentas e dals students sco era da las furmas modernas d’instruir e d’emprender.
Furmaziun professiunala
La SAP dal Grischun na sa chapescha betg mo sco lieu da scolaziun per persunas d’instrucziun futuras, mabain era sco patruna engaschada per emprendistas ed emprendists en differents champs professiunals. Cun nossa purschida da plazzas d’emprendissadi pussibilitain nus a persunas giuvnas d’entrar en il mund professiunal e nus als accumpagnain sin lur via ad ina scolaziun fundada, pratica ed orientada vers l’avegnir.
Actualmain avain nus plazzas d’emprendissadi en las suandantas professiuns:
- Commerziant:a AFQ
- Informaticher/informaticra AFQ, direcziun svilup d’applicaziun
- Spezialist:a dad ICT AFQ
Ultra da quai purschain nus – nua che quai è pussaivel – plazzas da praticum en questas professiuns e sustegnain activamain nossas emprendistas e noss emprendists da frequentar la scola da maturitad professiunala (SMP). Uschia avrin nus vias da furmaziun supplementaras e promovain las pussaivladads da svilup individualas.
Fitg legraivlas èn actualmain las suandantas istorgias da success: La SAP dal Grischun ha pudì engaschar ils onns 2024 e 2025 duas persunas che han terminà cun success lur emprendissadi tar la SAP e promova ussa quellas intenziunadamain en lur perfecziunaments. Ultra da quai è in anteriur emprendist dad IT sa sviluppà vinavant e lavura uss sco mainaproject – in bel exempel per ina promoziun persistenta da la generaziun giuvna e per perspectivas da svilup a lunga vista a la SAP dal Grischun.
Nossa finamira è da porscher ad emprendistas ed emprendists in ambient inspirant, en il qual els pon sviluppar lur abilitads, surpigliar responsabladad e realisar activamain lur avegnir professiunal.
Ulteriurs temas che pudessan interessar Vus
