Furmaziun cuntinuada e servetsch

323 persunas d’instrucziun, manaders e manadras da scola e docentas e docents han frequentà il 2025 in CAS a la SAP dal Grischun. Ils otg CAS dattan la pussaivladad da sa sviluppar vinavant en novas funcziuns, da s’approfundar en in champ specific u da s’occupar cun in tema ch’è datiers a la scola.

Sis CAS han cumenzà la stad 2025:

• Il CAS Autur:a da meds d’instrucziun ha cumenzà cun 35 participantas e participants. En quest CAS, ch’è gia vegnì realisà pliras giadas e che vegn manà atras en il ritmus da dus onns, approfundeschan las persunas d’instrucziun lur cumpetenzas areguard la creaziun d’incaricas d’emprender. In aspect central da quest CAS è ch’ils participants e las participantas creeschan davent da l’entschatta lur agen med d’instrucziun – analog u digital – sa basond sin inputs teoretics, barats colleghials e rapports d’experientscha or da la pratica. Il CAS sa sviluppa cuntinuadamain vinavant. Actualmain per exempel cun s’occupar dals potenzials e cunfins da la IA, schebain en vista al svilup da meds d’instrucziun sco era al diever da quels entras las persunas ch’emprendan.
• Cun 26 participantas e participants ha cumenzà il CAS Svilup da l’instrucziun cun il model da Cuira. L’interess or da l’entira Svizra tudestga sco er dal Liechtenstein e da l’Austria suttastritga la derasaziun dal model en la pratica. En il CAS vegnan las participantas ed ils participants accumpagnads en il svilup da l’instrucziun per introducir il model da Cuira en lur classa.
• En pliras scolas autas s’etableschan ils CAS Tudestg sco segunda lingua (DaZ) e Didactica da la scola auta. A la SAP dal Grischun reusseschi da cumenzar ils dus CAS cun passa 40 persunas da la Svizra orientala e da l’exteriur vischin. Las participantas ed ils participants apprezieschan surtut la stretga colliaziun tranter teoria e pratica sco era la pussaivladad da lavurar vi da dumondas individualas dal svilup da l’instrucziun.
• Il CAS Direcziun da la scola porscha la SAP dal Grischun dapi blers onns en la Rait da mainascolas en cooperaziun cun la Scolas autas da Turgovia e Son Gagl. Il 2025 ha cumenzà in nov studi ch’è concepì a moda modulara e che pussibilitescha uschia dapli flexibilitad areguard l’approfundaziun specifica e l’intensitad temporala. Plinavant po il CAS vegnì extendì ad in DAS. Dapi la stad 2025 han tut ils trais chantuns la medema responsabladad per la scolaziun.
• Il CAS Art ed intermediaziun è vegnì sviluppà vinavant da la direcziun dal CAS ed ha pudì cumenzar cun 15 participantas e participants. Entras l’occupaziun cun ovras artisticas sensibiliseschan las participantas ed ils participants lur percepziun, sviluppan novas perspectivas ed elavuran sezs concepts per l’intermediaziun da differents settings da furmaziun.

In grond interess n’hai betg mo dà per ils CAS. 1’516 participantas e participants han fatg part da 132 curs.

Plinavant ha il prorectorat realisà 37 perfecziunaments a l’intern da la scola sco era sustegnì tschintg scolas cun coachings u accumpagnà ellas en lur projects davart il svilup da la scola e da l’instrucziun.

Malgrà il success vegn la purschida sviluppada vinavant ed orientada vers il futur. En in process structurà vegnan las purschidas analisadas cun factsheets e reflectadas en in soundingboard cun persunas d’instrucziun, manaders e manadras da scola ed expertas ed experts da furmaziun. Ils resultats vegnan integrads en in process da svilup da strategia ch’è la basa per il svilup da la purschida dal prorectorat.