2200 participantas e participants ha la SAP dal Grischun pudì beneventar als curs durant l’onn da rapport. Era quest onn è la varietad dals temas, en ils quals las persunas d’instrucziun èn sa scoladas vinavant, stada vasta. In tema ha sveglià in grond interess: il diever da l’intelligenza artifiziala. Ils curs planisads èn stads occupads svelt e la SAP dal Grischun ha pudì metter a disposiziun a curta vista ulteriuras purschidas. Plinavant èn bleras scolas s’annunziadas per s’occupar dal tema en perfecziunaments a l’intern da la scola, accumpagnads da la SAP dal Grischun, e per sviluppar cuminaivlamain la via adattada per la scola.

Ina tendenza vers furmaziuns supplementaras pli curtas sa mussa per tut la Svizra e sur ils cunfins da las scolas autas da pedagogia or. Per instituziuns cun purschidas da furmaziun supplementara – uschia era per la SAP dal Grischun – munta quai in act equilibristic: Ellas ston satisfar als basegns da las participantas e dals participants tant areguard il format sco er areguard il cuntegn ed ellas ston sviluppar a medem temp purschidas d’auta qualitad. I dat differents temas che sa laschan tractar en formats pli curts. Auters temas basegnan in’occupaziun pli lunga e pli profunda per pudair transmetter las enconuschientschas en la pratica, adina cun la finamira da sustegnair ils uffants sin lur via d’emprender.

Igl è allegraivel da vesair che las participantas ed ils participants da las scolaziuns CAS s’occupan pli profundamain cun in tema. Durant l’onn da rapport han 45 participantas e participants terminà cun in certificat las scolaziuns CAS Furmaziun en la midada digitala, Autur:a da meds d’instrucziun, Tudestg sco segunda lingua u Svilup da l’instrucziun cun il model da Cuira. En il rom da la rait Direcziun da la scola, en cooperaziun cun la SAP da Turgovia e cun la SAP da Son Gagl, han ultra da quai 44 participantas e participants terminà il CAS Direcziun da la scola. L’effect d’in CAS è stà d’observar en moda impressiunanta durant la scuntrada d’alumni da las anteriuras participantas e dals anteriurs participants dal CAS Svilup da l’instrucziun cun il model da Cuira. Ellas ed els han discutà las sfidas ed ils success en la realisaziun dal model da Cuira en lur mintgadi da scola. La segunda part da l’occurrenza è vegnida colliada cun in inscunter da la Rait emprender da maniera eterogena. Muments-staila dal model da Cuira èn stads en il center tant da la perspectiva teoretica sco er en furma d’exempels d’instrucziun ch’èn vegnids preschentads da las absolventas e dals absolvents dal CAS. Grazia a lur satgados plain experientschas èn naschids discurs interessants e bleras participantas e participants han prendì a chasa muments d’aha, ideas e motivaziun per concepir lur instrucziun.

Anc pli intensiv ch’en in CAS s’approfundeschan las studentas ed ils students en il master Pedagogia curativa da scola. Quest studi vegn purschì da la Scola auta interchantunala da pedagogia curativa e da la Scola auta da pedagogia dal Grischun a Cuira. Il studi da master consecutiv è concepì en furma modulara e porscha a las studentas ed als students flexibilitad areguard il temp, il lieu ed il cuntegn da lur studi. Ins ha pudì resguardar la gronda dumonda cun eliminar la limitaziun. Il dumber da las studentas e dals students è s’augmentà per il dubel. Ina mesadad da l’instrucziun surpiglian docents e docentas da la SAP dal Grischun,  tschella mesadad docents e docentas da la Scola auta interchantunala da pedagogia curativa. Las cifras mussan da maniera impressiunanta il success dal studi che contribuescha fermamain da cumbatter la mancanza da persunas spezialisadas.