Skip to content

En il focus

Novs studis

Cun ils novs studis pledenta la SAP dal Grischun novas gruppas en mira e resguarda en il medem mument ils basegns spezials dal chantun Grischun.

Dapi il semester d’atun 2022 sa preschenta il portfolio dals studis a la SAP dal Grischun en ina furma pli extendida (stgalim secundar I per persunas cun in bachelor spezialisà, stgalim secundar I e scolas da maturitad per persunas cun in master spezialisà) sco er en ina furma adattada (scolina e scola primara, scola primara, stgalim secundar I per persunas d’instrucziun dal stgalim primar, pedagogia curativa da scola) (cfr. illustraziun 1).

Illustraziun 1: Studis a la SAP dal Grischun dapi il semester d’atun 2022

La consideraziun dals basegns spezials dal chantun Grischun, en spezial da sia trilinguitad, sia situaziun periferica e da las numerusas scolas pitschnas en il territori alpin, pretenda

  • studis da bachelor cun lingua da scola tudestg, rumantsch e talian per scolar allroundras ed allrounders resp. generalistas e generalists;
  • studis da master cun ils roms rumantsch e/u talian;
  • ina furmaziun da la pratica professiunala en las regiuns linguisticas correspundentas;
  • la pussaivladad da far ils studis a temp parzial.

Il studi scolina e scola primara cumpiglia dapi l’atun 2022 ils dus onns da scolina sco era las emprimas duas classas da la scola primara. Quest studi maina ad ina qualificaziun d’instruir per il ciclus 1 tenor il Plan d’instrucziun 21 e remplazza il studi da bachelor da scolina da pli baud. La structura dal studi scola primara resta medema e cumpiglia vinavant l’emprima fin la sisavla classa da la scola primara.

L’integraziun dals studis en il rom da qualificaziun naziunal (nqf-ch) mussa ils studis da bachelor e da master sin l’emprim e segund stgalim da la furmaziun academica da basa. Il terz stgalim academic cun studis da doctorat ed il dretg da promoziun respectiv resta resalvà a las scolas autas universitaras. La furmaziun supplementara academica sin il stgalim da la scola auta contribuescha considerablamain al process da professiunalisaziun da las persunas d’instrucziun. Quest process da professiunalisaziun cumpiglia la furmaziun academica da basa, la fasa da l’introducziun en la professiun sco er experientscha professiunala da tschintg fin diesch onns. L’illustraziun 2 mussa tge studis e scolaziuns che la SAP dal Grischun porscha.

Illustraziun 2: Ils studis da la SAP dal Grischun en il rom da qualificaziun naziunal (nqf-ch)

Las dumondas d’examinar las premissas per renconuscher ils studis da bachelor “scolina e scola primara” sco era “scola primara” èn vegnidas inoltradas la stad 2022 per mauns da la Conferenza svizra da las directuras e dals directurs chantunals da l’educaziun publica. La conferma da la renconuschientscha dals studis tras la CDEP per las scolas autas da pedagogia en general e per la SAP dal Grischun en spezial è da grond’impurtanza. Ils motivs èn multifars. D’ina vart l’examinaziun da qualitad externa e las mesiras da svilup internas che pon sa resultar sin il nivel dal program ed il nivel instituziunal. Da l’autra vart era per mantegnair l’attractivitad dals studis al lieu da studi Cuira per studentas e students extrachantunals.