Prorectorat
Furmaziun cuntinuada e servetsch
Las pretensiuns a las persunas d’instrucziun ed a las scolas sa chattan en ina transformaziun persistenta. La SAP dal Grischun sustegna ils differents acturs – sin plirs nivels.
Perfecziunament efficazi da las persunas d’instrucziun
Era l’onn 2022 è la purschida da la furmaziun cuntinuada e da servetsch vegnida sviluppada vinavant. Il svilup è tranter auter s’orientà vi da las caracteristicas dal perfecziunament dals scolasts (Lipowsky e Rzejak, 2012), cun in focus sin la persistenza sco era sin inscunters ed il barat da persunas d’instrucziun ed ulteriurs acturs en il panorama da furmaziun.
“Inscunters”: crear in spazi per ils inscunters
Era l’onn 2022 è la purschida da la furmaziun cuntinuada e da servetsch vegnida sviluppada vinavant. Il svilup è tranter auter s’orientà vi da las caracteristicas dal perfecziunament dals scolasts (Lipowsky e Rzejak, 2012), cun in focus sin la persistenza sco era sin inscunters ed il barat da persunas d’instrucziun ed ulteriurs acturs en il panorama da furmaziun.
Persistenza tras process da svilup pli lungs
La durada da las furmaziuns supplementaras e dals process da svilup n’è bain nagina caracteristica suffizienta, dentant ina caracteristica necessaria per intimar midadas ed uschia avair in effect persistent. Per fortuna avain nus pudì accumpagnar il 2022 durant in temp pli lung intginas scolas en lur process da svilup da la scola e da l’instrucziun. En ils curs e tar ils perfecziunaments a l’intern da la scola è savens vegnida purschida pli tard ina segunda part per approfundar e barattar las experientschas. En la furmaziun supplementara individuala per las persunas d’instrucziun avain nus engrondì fermamain la purschida da las scolaziuns cun certificat CAS, uschia che las persunas d’instrucziun han la pussaivladad d’acquistar cumpetenzas pli profundas en in tema. En spezial po vegnir accentuada la planisaziun da la carriera en vista a la pedagogia curativa da scola. Ultra dal studi da master, pon uss era vegnir absolvids singuls moduls u differents CAS; uschia pon las persunas d’instrucziun sviluppar lur portfolio persunal.
Furmaziun en la midada digitala
La midada digitala na sa ferma era betg avant las portas da las scolas. Cun il “lernLAB”, in sistem per il management d’emprender, avain nus pudì sustegnair las emprimas scolas en lur purschida per l’emprender da maniera autodirigida – er en in’instrucziun da preschientscha pli e pli individualisada. Il “lernLAB” ha integrà il Plan d’instrucziun 21 cumplet e porscha instruments effizients e flexibels per concepir in’instrucziun moderna.
Era differentas ulteriuras purschidas, da curs dal di fin a CAS, sustegnan las persunas d’instrucziun en ils temas multifars areguard la midada digitala. Ultra da quai accumpogna er il post spezialisà da MINT las scolas tar ils svilups necessaris en quest reguard.
Svilups en il prorectorat
En il prorectorat furmaziun cuntinuada e servetsch stattan las purschidas en il center. Nus avain dentant era pudì cuntanscher bler en connex cun la structura. L’onn passà è segiramain l’integraziun dals trais posts spezialisads stada en il center. Entant ch’ils posts spezialisads “evaluaziun” e “promoziun da MINT” vegnan mintgamai manads d’ina persuna responsabla, vegn il post spezialisà e-learning manà d’in gremi. Ils posts spezialisads evaluaziun ed e-learning elavuran per gronda part incumbensas internas.
