Prorectorats
ADMINISTRAZIUN
Las iniziativas da l’administraziun han la finamira da far che la SAP dal Grischun daventa in lieu da studi e da lavur attractiv.
Entant che la realisaziun da l’adattaziun structurala, decidida dal cussegl da la scola auta è vegnida terminada a l’entschatta da l’onn e ch’ins ha uschia pudì cuntanscher in term impurtant per la SAP dal Grischun da l’avegnir, han ins al medem temp pudì entschaiver las lavurs da planisaziun per il schlargiament dals secturs persunal e finanzas cun la finamira da pudair gestiunar quests secturs cumplettamain a l’intern da la SAP dal Grischun a partir dal 2023 resp. 2024. Sco sfida speziala è sa manifestada la recrutaziun da las collavuraturas e dals collavuraturs necessaris. Tar incumbensas administrativas s’accentuescha la concurrenza per persunal qualifitgà. La revisiun parziala da la lescha da persunal, entrada en vigur il 1. da schaner 2023 po contribuir dad augmentar la cumpetitivitad da la SAP dal Grischun sco patruna independenta dal dretg public. La gestiun cumpletta dal persunal intenziunada tras la SAP dal Grischun vegn plinavant ad esser ina contribuziun ad ina assistenza optimada da las collavuraturas e dals collavuraturs.
Cun il concept d’utilisaziun e da gestiun han ins pudì cuntanscher in ulteriur term impurtant per la SAP dal Grischun da l’avegnir. Ensemen cun studentas e students, cun docentas e docents da tut ils roms, cun represchentantas e represchentants dals prorectorats furmaziun, furmaziun cuntinuada e perscrutaziun e svilup sco era cun collavuraturas e collavuraturs da l’administraziun han ins eruì en in process che represchenta ina gronda part da l’instituziun, las pretensiuns ad ina infrastructura moderna che promova il process d’instruir e d’emprender. L’occupaziun cun l’agen plaz da lavur da l’avegnir ha inizià discussiuns interessantas che ans vegnan ad accumpagnar vinavant en quest process. Igl è sa mussà en quest connex che impuls da reflexiun na fineschan betg sin la sava dal local da seminar resp. a la porta dal biro, mabain ch’els considereschan l’entir campus sco lieu d’instruir, d’emprender e da lavurar.
“Mia”
Infurmaziuns sin mesira sin ina plattafurma centrala
Quai che ha cumenzà il 2017/18 sco project d’emprender en l’informatica, ha pudì vegnir sviluppà quest onn ad ina plattafurma centrala per studentas e students. Il svilup da la plattafurma è succedì en stretga collavuraziun tranter il prorectorat furmaziun, studentas e students e l’informatica da la SAP dal Grischun. Studentas e students e docentas e docents han uschia access a lur infurmaziuns sin mesira. Cun il update previs per il 1. quartal 2023 pon commembras e commembers da la Scola auta reservar locals d’instrucziun, pon docentas e docents administrar lur occurrenzas d’instrucziun, pon manadras e manaders da curs inoltrar dumondas per curs. L’integraziun da la carta da biblioteca, la pussaivladad dad annunziar directamain mancanzas e defects u savair leger la qualitad da l’aria e la temperatura da las localitads per dar aria da maniera intenziunada, quai èn mo in pèr dals ulteriurs pass planisads.
Il num “Mia” – in pled rumantsch e talian – è vegnì elegì sapientivamain per suttastritgar d’ina vart la plurilinguitad da la SAP dal Grischun ed a medem temp per resumar las funcziuns da la plattafurma sco “mes studi”, “mes urari”, “mias datas da contact” euv.
En la retrospectiva ord vista da l’administraziun è l’onn 2022 stà sut l’accent da la finamira strategica “sviluppar la SAP dal Grischun da l’avegnir”. Ins ha pudì cuntanscher terms impurtants e crear fundaments necessaris, adina cun il sguard a la finamira dad augmentar l’attractivitad da la SAP dal Grischun sco lieu da studi e da lavur.
Ulteriurs temas che pudessan interessar Vus
