En il focus
Pedagogia curativa da scola:
svilup e flexibilisaziun da la purschida da studi
La regenza dal chantun Grischun sco era la SAP dal Grischun s’engaschan communablamain per il svilup da la pedagogia curativa da scola en il chantun.
Il chantun Grischun vul reducir vinavant la mancanza da pedagogas curativas e da pedagogs curativs. La regenza ha approvà in project da pilot correspundent e desista en l’avegnir da limitar plazzas da studi en la pedagogia curativa da scola. La nova purschida da studi a Cuira è fitg individualisada ed è concepida tenor ils basegns moderns da las studentas e dals students sco era da las scolas. Realisà vegn il project da la SAP dal Grischun en cooperaziun cun la Scola auta interchantunala per pedagogia curativa (HfH).
La situaziun dal persunal en las scolas è daventada pli acuta per quest onn da scola e pertutga en spezial la necessitad da persunas d’instrucziun qualifitgadas en il sectur da la pedagogia curativa da scola. Cun la purschida da studi Pedagogia curativa da scola che ha da nov lieu mintg’onn e cun l’aboliziun da la limitaziun da las plazzas da studi, pon en il futur mintga onn pli che 25 persunas d’instrucziun cumenzar il studi a la SAP dal Grischun. Uschia contribuescha il chantun Grischun, ensemen cun la SAP dal Grischun sco era cun la HfH, in’impurtanta part per meglierar la situaziun dal persunal e la qualitad en il sectur da la pedagogia speziala. Quai tant en las scolas regularas sco er en las scolas spezialas.
Promoziun da la segirezza da planisaziun e svilup dal persunal
Per las instituziuns ch’èn responsablas per la scola, per las direcziuns da las scolas e per las persunas che s’interesseschan per il studi datti ina pli gronda segirezza da planisaziun cun las decisiuns prendidas. Las scolas pon pia planisar ad uras l’engaschament dal persunal sco er il svilup dal persunal.
Flexibilisaziun tematica e temporala da las purschidas da studi
Il studi da master Pedagogia curativa da scola porscha a las studentas ed als students in maximum da flexibilitad quai che pertutga cuntegns ed uraris. Grazia a quella pon las studentas ed ils students prender en vista ina furmaziun da profil sin mesira per l’agen champ da lavur. Al lieu da studi a Cuira vegnan purschids tut ils moduls obligatoris (60 ECTS) sco er ils moduls opziunals obligatoris davart ils accents dal studi emprender e sa cumportar (20 ECTS). Grazia a la flexibilisaziun temporara pon vegnir absolvids ulteriurs moduls a la HfH a Turitg. En connex cun l’adattaziun da las structuras ed il svilup da las scolaziuns manegia Arno Ulber, responsabel per il champ Pedagogia curativa da scola a la SAP dal Grischun: “Las studentas ed ils students pon en l’avegnir decider sezs quants moduls ch’els frequentan durant in semester e pon uschia coordinar il meglier pussaivel las pretensiuns professiunalas e privatas.” Il studi cumplementar a la professiun dura almain quatter e maximalmain otg semesters.
Moduls sco furmaziun supplementara
Cumplementarmain a la purschida da studi pon da nov era vegnir absolvids singuls moduls dal studi da master sco furmaziun supplementara. Questa purschida en il rom dal model da carriera pussibilitescha a persunas d’instrucziun interessadas d’acquistar enconuschientschas da basa en il champ da la pedagogia curativa da scola, d’esser vinavant ina persuna d’instrucziun regulara e d’absolver eventualmain pli tard il studi da master.
Purschida da studi Pedagogia curativa da scola
Diplom
Master of Arts da la Scola auta per pedagogia curativa a Turitg en Special Needs Education
Durada
cumplementar a la professiun, 4 – 8 semesters
Dimensiun
90 puncts da credit tenor ECTS
Dis da studi
moduls d’in mez di, avant- e suentermezdi (gievgia/venderdi)
Cumenzament
settember
